चितवन, भाद्र २३
गोल्डेन ईमिनेन्ट दोस्रो चितवन गोल्डकप असोज ३ गतेदेखि हुने भएको छ । आयोजक भरतपुर फुटबल क्लब (बिएफसी) ले आईतबार आयोजित पत्रकार सम्मेलनमार्फत प्रतियोगिता बारे औपचारिक जानकारी दिएको हो ।
नेपाल प्रहरी शिक्षालय भरतपुर तालिमकेन्द्रको मैदानमा हुने प्रतियोगिता असोज १२ गतेसम्म चल्नेछ । प्रतियोगितामा ए डिभिजन, नेपाल सुपर लिग र मोफसल उत्कृष्ट क्लब गरी १० टोली सहभागी हुनेछन् । प्रतियोगितामा आयोजक बिएफसी, सूर्यपुर एफसी, नेपाल पुलिस क्लब काठमाडौं, बुटवल लुम्बिनी एफसी, बागमती युवा क्लब सर्लाही, वीरगञ्ज युनाईटेड, सल्हेस एफसी सिराहा, न्यु स्टार सुनसरी र राइजिङ स्टार भुमही सहभागी हुनेछन् । थप एक टिमको कागजी प्रक्रिया पुरा हुन बाँकी रहेको संयोजक धुर्व भुसालले जानकारी दिर्नुभयो ।
प्रतियोगिताको उद्घाटन खेलमा असोज सूर्यपुर एफसी र बागमती युवा क्लब भिड्नेछन् । उद्घाटन खेल दिउँसो ३ बजे हुनेछ । त्यस अघि एक भव्य कार्यक्रमकाबीच प्रतियोगिताको उद्घाटन गरिने भुसालले बताउनुभयो । प्रतियोगिताको विजेताले ट्रफीसहित ६ लाख तथा उपविजेताले ३ लाख रुपैयाँ प्राप्त गर्नेछ । यस्तै प्रतियोगिताभरको उत्कृष्ट खेलाडीले १५, विधागत उत्कृष्टले १० तथा म्यान अफ दि म्याचले ५ हजार रुपैयाँ प्राप्त गर्नेछन् ।
करिब ४० हजार दर्शकले प्रत्यक्ष रुपमा प्रतियोगिताको खेलहरु अवलोकन गर्ने आयोजकको अनुमान छ । दर्शकका लागि पहिलो चरणमा ५०, क्वाटरफाइनल र सेमिफाइनलमा एक सय तथा फाइनलमा दुई सय रुपैयाँको टिकटको व्यवस्था गरिएको संयोजक भुसालले जानकारी दिर्नुभयो । प्रतियोगिताको तयारी तीव्र रुपमा अघि बढेको उहाँले बताउनुभयो ।
प्रतियोगिताको मुख्य प्रायोजकमा गोल्डेन ईमिनेन्ट ईन्टरनेशनल तथा सह प्रायोजकमा हानामी ईन्टरनेशनल एजुकेसन रहेका छन् । बागमती प्रदेश सरकार, भरतपुर महानगरपालिका र चितवन जिल्ला फुटबल संघ प्रतियोगिताको प्रवर्द्धक संस्था हुन् ।
पत्रकार सम्मेलनमा चितवन जिल्ला फुटबल संघका अध्यक्ष श्रीकृष्ण कार्कीले चितवनमा समय फुटबल गतिविधि बढ्नुको साथै खेलाडीहरुको समेत स्तरवृद्धि भइरहेको भन्दै यस किसिमका ठूला प्रतियोगिता चितवनमा हुन आवश्यक रहेको बताउनुभयो ।
प्रतियोगिताको मुख्य प्रायोजक गोल्डेन इमिनेन्टका प्रबन्ध निर्देशक प्रकाश रिजालले चितवनको फुटबल लगायत खेलकुद प्रतियोगितामा सदैव सहयोग गर्दै आइरहेको भन्दै आगामि दिनमा पनि फुटबलको विकासका लागि सहकार्य गर्न तयार रहेको बताउनुभयो । सो क्रममा बोल्दै प्रतियोगिताको टिकेटिङ पार्टनर एक्सपर्ट एजुकेशन एण्ड भिजा सर्भिसेस चितवनका बिजनेश डेभलपमेन्ट म्यानेजर विनोदबाबु रिजालले चितवनले गौरव गर्न लायक फुटबल प्रतियोगितामा सहकार्य गर्न पाउँदा खुशी व्यक्त गर्नुभयो ।
यसैबीच सोही पत्रकार सम्मेलनमा प्रतियोगिताका विजेताले पाउने ट्रफी समेत अनावरण गरिएको छ । चितवन गोल्ड कपको पहिलो संस्करण २०७९ भदौ २५ देखि असोज ३ गतेसम्म सञ्चालन । पहिलो संस्करणको उपाधि त्रिभुवन आर्मी क्लबले जितेको थियो ।
