४ आश्विन २०८१, शुक्रबार २३:०९
चितवन, असोज ४
चितवनको भरतपुरमा रहेको बीपी कोइराला मेमोरियल क्यान्सर अस्पतालले सप्ताहव्यापी कार्यक्रम गर्दै आफ्नो वार्षिकोत्सव मनाउन शुरु गरेको छ ।अस्पतालले आफ्नो २५ औं वार्षिकोत्सव तथा २० औं राष्ट्रिय क्यान्सर सतर्कता दिवस मनाउन लागेको हो ।
अस्पतालले आज पत्रकार सम्मेलनको आयोजना गरि उक्त जानकारी दिइएको हो । कार्यकारी निर्देशक डा. शिबजी पौडेलले अस्पतालले स्थापना दिवसको अवसरमा गर्न लागेका कार्यक्रमहरु र अस्पताल सुधारका बारेमा जानकारी दिर्नुभयो ।
डा पौडेलका अनुसार असोज ४ गते बाट एक साता व्यापी कार्यक्रम आयोजना गर्दैछ । त्यसको लागि स्वास्थ्य सम्बन्धी प्रशिक्षण, उपचार र रक्तदानलगायतका कार्यक्रमहरु छन् । मुख्य दिन सम्मानीय राष्ट्रपति रामचन्द्र पौडेल प्रमुख अतिथि रहनुहुने औपचारिक कार्यक्रम पूर्व सोही दिन बिहान चौविसकोठीबाट म्याराथुन समेत आयोजना गरिँदैछ ।
२०५६ श्रावण ४ गते शल्य चिकित्सा तथा २५ शैयाबाट अन्तरंग सेवा प्रारम्भ गरेको यस अस्पतालमा यतिवेला पाँच सय शैया छन् भने, अस्पताललाई अझ विशिष्टिकृत गर्दै अझै विशिष्टिकृत सेवा सञ्चालन गर्ने लक्ष रहेको कार्यकारी निर्देशक पौडेलले जानकारी दिर्नुभयो ।
अस्पतालले पछिल्ला वर्षहरुमा क्यान्सर रोगीको उपचारको साथै अध्ययन अध्यापनको क्षेत्रमा नर्सिङ्ग कलेजको स्थापना गरेको छ । त्यस्तै अस्पतालले चिकित्सातर्फ विभिन्न विधामा स्नातकोत्तरपश्चात् प्रदान गरिने तालिम नेपाल मेडिकल काउन्सिलबाट मान्यता प्राप्त पोष्ट ग्याजुयट फेलोसिप ट्रेनिङ तेस्रो व्याच सञ्चालन गरि सकेको छ । चिकित्सा शिक्षा आयोगका कार्यक्रम अन्तगत तीन विषयमा तीन वर्षे एनबीएमएस सञ्चालनमा छ ।
मित्रराष्ट्र चीन सरकारको आर्थिक, प्राविधिक र जनशक्ति सहयोगमा निर्मित अस्पताल २०५६ साल देखि औपचारिक रुपमा सेवा प्रारम्भ गरेको हो । २०४८ चैत्र ३ गते तत्कालिन प्रधानमन्त्री स्व.श्री गिरिजाप्रसाद कोइराला र तत्कालिन चिनिया प्रधानमन्त्री लिफङ बीच द्विपक्ष्ािय सहयोग अभिबृद्धि गर्न नेपालमा क्यान्सर अस्पताल स्थापना गर्न चीनको राजधानी बेइजिङमा दुई पक्ष बीच समझदारी भएको थियो । सोही अनुसार २०४९ श्रावण २७ प्रथम पटक बी. पी. कोइराला मेमोरियल क्यान्सर अस्पताल परियोजना व्यवस्था समिति गठन भई कार्य आरम्भ भएको थियो भने, अस्पतालको औपचारिक उद्घाटन २०५६ असोज १० गते गरिएको थियो । अस्पतालको स्थापनाको दिन पारेर प्रत्येक असोज १० गतेलाई सरकारले राष्ट्रिय क्यान्सर सकर्तता दिवस घोषणा गरेको हो ।
अस्तपालमा कर्मचारी एवं चिकित्सक गरि ८२१ जना कार्यरत छन् । ती मध्ये ७५ जना स्पेशलिष्ट चिकित्सक छन भने १९ जना मेडिकल अफिसर, २८ जना ल्याब, १७ जना रेडियोलोजिष्ट, १३ जना रेडियो थेरापिष्ट, १० जना एनेथेसिया र २६४ जना नर्सिङ स्टाफ र व्यवस्थापन तर्फ २३३ जना कर्मचारीहरु रहेका छन् ।
