चितवन, कार्तिक ४
चितवनको भरतपुर ४ रामघाट निवासी १८ वर्षीय युवा सुमंगल स्वामी (शिरिष बगाले) ले भरतपुर लंकुमा रहेको लक्ष्मी बैकुण्ठनाथ मन्दिरदेखि भारतको बागेश्वरधामसम्म पैदल यात्रा गर्ने भएका छन् ।
कार्तिक ६ गतेबाट उनले पैदल यात्रा सुरु गर्न लागेका हुन् । पैदल यात्रा गर्नेबारे उनले आज पत्रकार सम्मेलनमार्फत जानकारी गराएका छन् ।
लक्ष्मी बैकुण्ठनाथ मन्दिर परिसरमा आयोजित पत्रकार सम्मेलनमा बोल्दै उनले लक्ष्मी बैकुण्ठनाथ मन्दिरदेखि पूर्वि नेपालको चतराधाम हुँदै भारतको बागेश्वर धामसम्म पैदल यात्रा गरिने बताए ।
विश्व शान्तीको कामना, हिन्दु राष्ट्रको पहिचान विश्वभरि फैलाउन र भरतपुरलाई विश्वसामु चिनाउनुपर्छ भन्ने उद्देश्यका साथ पैदल यात्रा गर्न लागिएको उनको भनाइ छ ।
बिहान ७ देखि १० बजेसम्म मन्दिरमा संकल्प गर्ने र १० बजेपछि यात्रा थाल्ने उनले जानकारी दिए । पैदल यात्राका क्रममा विभिन्न बाटोमा पर्ने विभिन्न स्थानहरुमा आफ्नो सनातन हिन्दु धर्मका बारेमा मानिसहरुलाई बताउँदै, हनुमान चालिसा गर्दै यात्रा गरिने उनले बताए ।
