३० कार्तिक २०८१, शुक्रबार ०७:५४
काठमाडौँ, कार्तिक ३०
प्रधानमन्त्री केपी शर्मा ओलीले राजनीतिक दलसम्बन्धी अध्यादेश ल्याउने कुरै सरकारले नगरेको दावी गरेका छन्।
बिहीवार काठमाडौँमा एउटा कार्यक्रममा प्रधानमन्त्री ओलीले यस्तो दावी गरेका हुन्। सरकार वा कांग्रेस अथवा एमाले कसैले पनि दल विभाजनसम्बन्धी अध्यादेश ल्याउने नभनेको उनले बताए।
‘संविधान संशोधन गर्ने भनेको हो। अहिले सरकारले कसैले दल विभाजनसम्बन्धी अध्यादेश ल्याउँछु भनेर भनेको छ? कांग्रेस, एमालेले भनेको छ, सरकारले भन्यो, मैले भनेँ? कसैले भनेको छैन‚’ उनले भने‚ ‘विपक्षी दलको आवाज थियो- हामीलाई विभाजन गर्न अध्यादेश ल्याउन लागियो। पहिला आफूले गरेको सम्झिनु भयो होला र तर्सिनु भयो होला‚ हामीले भनेको छैन।’
उनले कुनै पनि राजनीतिक दलमा ४० प्रतिशतले सँगै बस्न नमान्ने अवस्थामा राजनीतिक दलसम्बन्धी कानून ल्याउनुपर्ने हुनसक्ने बताए। कानून नबनाइ बस्न नहुने भन्दै कुनै न कुनै वेला कानून बनाउनैपर्ने उनले बताए।
उनले देश संविधानअनुसार चल्ने र संविधानअनुसार कानून बन्ने बताए। उनले संविधानअनुसार औचित्यपूर्ण ढंगले ल्याउनुपर्यो भने अध्यादेश पनि ल्याउनुपर्ने हुनसक्ने बताए।
