संघीय संसदका पाँच समितिको बैठक बस्दै, यस्ता छन् एजेण्डा

काठमाडौं, साउन ३० 

आज संघीय संसदका पाँच समितिको बैठक बस्दैछ ।आज प्रतिनिधि सभाका अन्तर्राष्ट्रिय सम्बन्ध र पर्यटन समिति, सार्वजनिक लेखा समिति, कृषि, सहकारी तथा प्राकृतिक स्रोत समिति र उद्योग तथा वाणिज्य र श्रम तथा उपभोक्ता हित समितिको बैठक बस्दैछ । त्यस्तै आज राष्ट्रिय सभा अन्तर्गतको विधायन व्यवस्थापन समितिको बैठक बस्दैछ ।

आज बिहान ११ बजे बस्ने अन्तर्राष्ट्रिय सम्बन्ध र पर्यटन समितिको बैठकमा नेपाल नागरिक उड्डयन प्राधिकरण विधेयक, २०८१ र नेपाल हवाई सेवा प्राधिकरण विधेयक, २०८१ माथि मन्त्रालयबाट वृहत्तर तुलनात्मक विश्लेषण सहितको प्रस्तुतिकरण र छलफल हुने कार्यसूची रहेको छ ।

त्यसैगरी बिहान ११ बजेदेखि शुरु हुने सार्वजनिक लेखा समितिको बैह्त्क्मा ट्रकको भारवहन क्षमता सम्बन्धमा समितिमा प्राप्त उजुरी उपर छलफल हुने कार्यसूची रहेको छ । त्यस्तै आज बिहान ११ बजेदेखि शुरु हुने कृषि, सहकारी तथा प्राकृतिक स्रोत समितिको बैठकमा हिन्दुकुश हिमालय सांसदहरूको बैठक-२०२५ सम्मेलनको हालसम्मको तयारीका सम्बन्धमा छलफल हुने कार्यसूची रहेको छ । त्यसैगरी आज बिहान साढे ११ बजेदेखि शुरु हुने उद्योग तथा वाणिज्य र श्रम तथा उपभोक्ता हित समिति बैठकमा निकासी पैठारी (नियमन) विधेयक, २०८१ माथि विषय विज्ञहरूसँग छलफल हुने कार्यसूची रहेको छ ।

त्यस्तै आज दिउसो २ बजेदेखि शुरु हुने विधायन व्यवस्थापन समितिको बैठकमा नेपाल नागरिकता (दोस्रो संशोधन) विधेयक, २०८१ माथि दफावार छलफल हुने कार्यसूची रहेको छ ।