१७ कार्तिक २०८२, सोमबार ०७:५७
काठमाडौँ, कार्तिक १७
जारी आइसीसी क्रिकेट विश्वकप लिग- २ अन्तर्गतको त्रिकोणात्मक सिरिजको पाँचौं खेलमा आज युएई र अमेरिका खेल्दैछन् । दुबई अन्तर्राष्ट्रिय क्रिकेट मैदानमा हुने यो खेल नेपाली समय अनुसार बिहान सवा ११ बजेदेखि शुरु हुदैछ ।
यस सिरिजमा अमेरिकाले लगातार तीन खेल जितेको छ भने युएईले एक खेल जितेको छ । अमेरिकाले नेपालविरुद्धका दुवै खेल र युएईविरुद्धको एक खेल जितेको छ भने युएईले नेपालविरुद्धको एक खेल जितेको छ ।
हाल विश्वकप लिग-२ मा अमेरिका २३ खेलमा ३४ अंकसहित शिर्ष स्थानमा छ भने युएई १८ खेलमा ८ अंकसहित पुछारमा रहेको छ । त्यस्तै नेपाल भने १९ खेलमा १२ अंकसहित सातौं स्थानमा छ ।
अमेरिका र युएईबीच अहिलेसम्म १० एकदिवसीय खेल भएका छन् । जसमा अमेरिकाले ८ खेल जितेको छ भने युएईले २ खेल जितेको छ ।
अक्टोबर २६ देखि नोभेम्बर ५ सम्म अमेरिका र युएईसँग हुने यस त्रिकोणात्मक सिरिजमा अर्को खेल नोभेम्बर ६ बुधबार नेपाल र युएई खेल्ने तालिका रहेको छ ।
