नवलपुर ,माघ २२
यहि माघ २६ गतेदेखि फागुन १ गतेसम्म नवलपरासी (पूर्व)को गैँडाकोटमा राष्ट्रिय स्तरको क्रिकेट प्रतियोगिता आयोजना हुने भएको छ । नव जागरण ग्रामीण विकास केन्द्र , गैँडाकोट ९ थुम्सीको आयोजनामा ‘दोस्रो गैँडाकोट मेयर कप राष्ट्रिय टी–ट्वान्टी क्रिक्रेट प्रतियोगिता २०७९’ आयोजना गर्न लागिएको हो ।
विकास केन्द्रका अध्यक्ष रामचन्द्र सापकोटाले विगतका वर्षमा जस्तै यसवर्षपनि मेयरकप टी ट्वान्टी क्रिकेटलाई निरन्तरता दिइएको आज आयोजित पत्रकार सम्मेलनमा जानकारी दिनुभयो ।
गण्डकी प्रदेशका ६ सहित नवलपरासी पश्चिम र चितवन सहित विभिन्न आठ जिल्लाबाट खेलाडीहरु ‘दोस्रो गैँडाकोट मेयर कप टी–ट्वान्टी क्रिकेट प्रतियोगितामा सहभागी हुने उहाँले बताउनुभयो । नवलपुर,बाग्लुङ,पर्वत,नवलपरासी,तनहुँ, स्याङ्जा, कास्की र चितवनको टिमवीच प्रतिस्पर्धा हुने र उद्घाटन खेल नवलपुर र पर्वतवीच हुने प्रतियागिताका संयोजक विष्णुप्रसाद कडेलले जानकारी दिनुभयो ।
प्रतियोगितामा विजेता टिमले २ लाख र उपविजेताले १ लाख ५० हजार नगद सहित कप,मेडल र प्रमाणपत्र प्राप्त गर्नेछन्। त्यस्तै अन्य विभिन्न विधामा म्यान अफ द सिरिजलाई १० हजार,इमर्जिङ प्लेयरलाई ७ हजार,बेस्ट ब्याट्स म्यान,बेस्ट बलर,बेस्ट किपर,बेस्ट फिल्डरलाई ५/५ हजार र म्यान अफ द म्याचलाई १ हजार पाँच सय नगद सहित कप,मेडल र प्रमाणपत्र प्रदान गरिने आयोजकले जनाएको छ ।
नव जागरण खेलकुद मैदानमा हुने प्रतियोगिताको मुख्य प्रायोजकमा ईनाक्षी इन्टरटेनमेन्ट प्रा लि र सापकोटा टान्सपोर्ट अष्टेलिया, प्रयोजकमा जयश्री फुड्स प्रालि र एम्स एब्रोड एजुकेशन रहेका छन् । त्यसैगरी सहप्रायोजकको रुपमा कर्मा रेष्टुरेन्ट एण्ड सेकुवा कर्नर,कालिका रिफाइनरी प्रालि, शुभलक्ष्मी सेनेटरी उद्याोग , स्मार्ट टेक एग्रो एण्ड बायोइनर्जी र नारायणी सामुदायिक वन उपभोक्ता समूहले सहयोग गरेका छन् ।
कार्यक्रममा गैँडाकोट नगरपालिकाका नगरप्रमुख मदनभक्त अधिकारी, गैँडाकोट ९ का वडाअध्यक्ष धामनाथ सापकोटा, नेपाल क्रिक्रेट संघ गण्डकी प्रदेशका कोषाध्यक्ष प्रकाश पौडेल, प्रतियोगिताका सह संयोजक विष्णुप्रसाद कडेल लगायतले बोल्नुभएको थियो भने पत्रकार सम्मेलन कार्यक्रमको संचालन नारायण सापकोटाले गर्नुभएको हो ।
