प्रधानमन्त्री दाहालको शान्ति सम्झौता पक्षधरहरु एक ठाउँमा उभिनु पर्नेमा जोड

काठमाडौं ,फागुन ८

नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल प्रचण्डले बाहृ बुँदे समझदारी, विस्तृत शान्ति सम्झौता र संविधान निर्माणका बेला एक ठाउँमा उभिएका शक्तिहरू फेरि पनि एकै ठाउँ उभिनुपर्ने बताउनु भएको छ ।

सोमबार पोखराको लेखनाथमा नेकपा माओवादी केन्द्र गण्डकी प्रदेश समितिको छैटौं पूर्ण बैठकलाई सम्बोधन गर्दै प्रधानमन्त्री दाहालले सो कुरा बताउनुभएको हो । उहाँले मुलुक राजनीतिक र आर्थिक रूपले अप्ठ्यारो परिस्थितिमा रहेको, राजनीतिमा दूषित हावा देखिएको, अर्थतन्त्र अप्ठ्यारो ठाउँमा रहेको भन्दै बाहृ बुँदे समझदारी, विस्तृत शान्ति सम्झौता र संविधान निर्माणका बेला जुन जुन शक्ति एक ठाउँ उभिएका थिए, फेरि पनि ती शक्तिहरू एक ठाउँ उभिन आवश्यक रहेको उल्लेख गर्नुभयो ।

प्रधानमन्त्री दाहालले भन्नुभयो– ‘राष्ट्रिय सहमतिमार्फत् मुलुकका समस्या समाधान हुनुपर्छ, राष्ट्रपति र उपराष्ट्रपतिमा राष्ट्रिय सहमति होस् भन्ने हाम्रो चाहनाको अन्तर्य पनि यही हो।’