आफूहरुले नयाँ विकल्प खोजिएको : प्रधानमन्त्री दाहाल

काठमाडौं ,फागुन  १९

नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल ‘प्रचण्ड’ले गत पुस २६ गते प्रतिनिधि सभाको बैठकमा एमाले अध्यक्ष केपी शर्माले संसद् विघटन ठीक थियो भन्ने अभिव्यक्ति दिएपछि आफूहरुले नयाँ विकल्प खोजेको बताउनु भएको छ ।
बिहीवार ८ दलीय गठबन्धनले काठमाडौंमा आयोजना गरेको सांसद अभिमुखीकरण कार्यक्रमलाई संवोधन गर्दै दाहालले यस्तो बताउनु भएको हो ।

उहाँले ओलीको पुस २६ गतेको विचारले आफूहरूलाई सोच्न बाध्य बनाएको उललेख गर्नुभयो । प्रधानमन्त्रीले भन्नुभयो ‘अघिल्लोपटक संविधानविपरित संसद् विघटन भएपछि हामी सबै संविधान र लोकतन्त्रको पक्षमा उभियौँ। संसद् पुर्नस्थापना गर्न सडकसम्म गयौं हाम्रो गठबन्धन लोकतन्त्र र संविधानको रक्षाका निम्ति थियो, विकास र समृद्धिको जनचाहना सम्बोधन गर्न थियो। तर, बिचमा हामी अलिकति अलमलियौँ, अब ठीक ठाउँमा आएका छौँ। गठबन्धन सुदृढ बनाएर अघि बढ्छौं ।’  प्रधानमन्त्री दाहालले राष्ट्रपतिका उम्मेदवार पौडेललाई आठ दलको मात्र नभई १० दलको समर्थन रहेको बताउनुभयो ।  स्वतन्त्र सांसदहरूको पनि पौडेललाई समर्थन रहेको दाबी गर्नुभयो ।