२१ फाल्गुन २०७९, आईतवार २२:४७
नवलपुर ,फागुन २१
नवलपरासी (बर्दघाट–सुस्तापूर्व)को गैँडाकोट–२ स्थित नारायणी नदी किनारमा ‘प्रथम गण्डकी प्रदेशस्तरीय औद्योगिक व्यापार महोत्सव २०७९’ सुरु भएको छ । आजदेखि सुरु भएको व्यापार मेलाको नेपाली कांग्रेसका नेता एवं यसै क्षेत्रका सङ्घीय सांसद प्राडा शशांक कोइरालाले उद्घाटन गर्नुभएकाे छ ।
मेलाको उद्घाटन गर्दै नेता कोइरालाले आफू कृषिमन्त्री भएको अवस्थामा कृषिमा ठूलै परिवर्तन ल्याउन सक्ने बताउनुभयो । “हुन त मलाई कृषिमन्त्री बन्न मन छैन । तर, मैले कृषि मन्त्रालय लिएँ भने कृषिमा अचम्मको कुरा गर्नसक्छु भन्ने त्यो विश्वास मसँग छ” नेता कोइरालाले भन्नुभयो । नेपालको कृषि क्षेत्रमा धेरै सम्भावना भएको भन्दै नेता कोइरालाले कृषि क्षेत्रको विकास नभएसम्म नेपालको विकास हुनै नसक्ने बताउनुभएको छ ।
कोइरालाले नेपालमा कृषि क्षेत्रमा सम्भावना हुँदाहुँदै पनि जमिनहरु बाँझो राख्नु दुर्भाग्य भएको बताउनुभयो । “अहिले गाउँमा गयो भने जमिनहरु बाँझो र रित्तो छन्” उहाँले भन्नुभयो , “हामीले कृषिलाई प्रोत्साहन गर्नुपयो ।” सरकारले कृषिलाई अनुदान दिनसक्नुपर्ने भन्दै नेता कोइरालाले कृषिमा सरकारले एक प्रतिशत पनि बजेट छुट्याउन नसकेको बताउनुभयो ।
महोत्सव उद्घाटनका क्रममा नेपाल उद्योग वाणिज्य महासङ्घका वरिष्ठ उपाध्यक्ष चन्द्रप्रसाद ढकालले स्थानीय उत्पादन र सेवालाई उपभोक्तासम्म पु¥याउन सकियो भने नेपालको व्यापार घाटा कम हुने बताउनुभयो । व्यवसायी ढकालले गण्डकी प्रदेश धेरै सम्भावनाहरु बोकेको प्रदेश भएकाले यहाँको आर्थिक विकासमा निजी क्षेत्रले महत्वपूर्ण भूमिका खेल्नसक्ने बताउनुभएको हो ।
नेपाल उद्योग वाणिज्य महासङ्घका पूर्व अध्यक्ष चण्डीराज ढकालले नेपाल गाह्रो अवस्थाबाट गुज्रिएको उल्लेख गर्दै ढकालले कोरोना कहरका कारण घटेको रेमिट्यान्स, विदेशी पर्यटक विस्तार बढ्न थालेको बताउनुभयो ।
नेपाल उद्योग वाणिज्य महासङ्घ गण्डकी प्रदेशको आयोजनामा सुरु भएको महोत्सवमा आयोजक संस्थाका अध्यक्ष सञ्जीवबहादुर कोइरालाले गण्डकी प्रदेशको आर्थिक उत्थानका लागि महोत्सव आयोजना गरिएको बताउनुभयो । महोत्सवका कारण गण्डकी प्रदेश सरकारले गौरवको आयोजनाकोरुपमा घोषणा गरेको नवलपुरको लोकाहा खोला औद्योगिक क्षेत्र, तनहुँको शुक्लागण्डकी तथा पोखरामा निर्माणाधीन औद्योगिक ग्राम एवं धौवादी फलाम खानी निर्माणका लागि सन्देश प्रवाह हुने कोइरालाको भनाइ छ । मेला मार्फत नवलपुरका सबै पर्यटकीय क्षेत्रको प्रवद्र्धन तथा सम्भावनाको खोजी गर्दै त्रिवेणीधामदेखि पोखरा हुँदै मुक्तिनाथसम्मको पर्यटकीय करिडरको प्रचार गर्ने कोइरालाले बताउनुभयो ।
महोत्सवको सहसंयोजक एवं जिल्ला उद्योग वाणिज्य सङ्घ नवलपुरका अध्यक्ष अमृत भट्टचनले गण्डकी प्रदेशको औद्योगिक, कृषिजन्य, हस्तकलाका उत्पादन, सूचना प्रविधि शिक्षा, स्वास्थ्य पर्यटनलगायत कृषिजन्य उत्पादनहरुलाई प्रवद्र्धन तथा बजारीकरणमा यस महोत्सवले सघाउ पु¥याउने बताउनुभयो ।
महोत्सवमा औद्योगिक व्यापार मेला, हस्तकला मेला, कृषि मेला, पुष्पमेला, अटोमेला, सूचना र प्रविधि प्रदर्शनी तथा दैनिक उपभोग्य वस्तुहरुको घरायसी सामान, लत्ताकपडा, श्रृङ्गारका सामग्रीसहितका ३०० स्टर रहेका भट्टचनले बताउनुभयो । गण्डकी प्रदेशको कान्छो जिल्ला नवलपुर जिल्लाले सिङ्गो गण्डकीलाई आत्मनिर्भर बनाउन सक्ने समाथ्र्य राखेका कारण व्यवसाय पर्वद्धनका लागि नवलपुरलाई छनोट गरिएको उहाँको भनाइ छ ।
‘उद्योग, व्यापार, कृषि र पर्यटनको समन्वय : समृद्ध र समुन्नत प्रदेशको उदय’ भन्ने मूल नाराका साथ सुरु भएको महोत्सव चैत १ गतेसम्म सञ्चालन हुनेछ । करिब रु १० करोड बराबरको कारोबार हुने अपेक्षा गरिएको महोत्सवको एक लाखले अवलोकन गर्ने अनुमान गरिएको छ । मेला अवधिभर विभिन्न सांस्कृति कार्यक्रम सञ्चालन हुनेछन् । महोत्सव प्रवेशका लागि सर्वसाधारलाई रु ८० तथा विद्यार्थीलाई रु ५० को टिकटको व्यवस्था गरिएको भट्टचनले बताउनुभयो ।
महोत्सव सुरु हुनुपूर्व गैँडाकोटको भृकुटी चोकबाट विभिन्न जातजाति तथा सङ्घसंस्थाहरुले सांस्कृतिक झाँकीसहितको शोभायात्रा निकालेका थिए ।
