२४ फाल्गुन २०७९, बुधबार १०:३२
प्रदिप परियार
चितवन ,फागुन २४
आगामी बैशाख १० गते चितवन क्षेत्र नं २ मा उपनिर्वाचन हुँदै छ । त्यसको लागि जिल्ला निर्वाचन कार्यालय चितवनले दाबी विरोधको कार्यक्रम सञ्चालन गरेको छ ।
दाबी विरोध कार्यक्रम अन्तर्गत मतदाताले उजुरी दिन र त्रुटि सच्याउन पाउने निर्वाचन कार्यालय चितवनका प्रमुख निर्वाचन अधिकारी भीमसेन कार्कीले जानकारी दिनुभएको छ । उहाँका अनुसार फागुन २५ गतेसम्म दाबी विरोधको कार्यक्रम सञ्चालन हुने छ ।
दाबी विरोधमा कसैले झूटो विवरण दिएर मतदाता नामावलीमा नाम दर्ता गराएको पाए निजविरूद्ध उजुरी दिन सकिन्छ । आफ्नो मतदाता नामावलीमा केहि त्रुटि छ भने त्यो सच्याउनको लागि निवेदन पनि दिन सकिने उहाँले बताउनुभयो ।
उहाँका अनुसार मृत्यु भएका मतदाताको विवरण बुझाउन वडा कार्यालयहरुलाई आग्रह गरिएको छ । मृत्यु भएका मतदाताको विवरण आउने क्रम जारी रहेको भन्दै उहाँले वडा कार्यालयले फागुन २७ गतेसम्म विवरण पठाउन सक्ने बताउनुभयो । निवेदनहरु प्राप्त भएपछि चैत १ गतेसम्म विवरण रुजु गरेर निर्वाचन आयोगमा पठाइने उहाँको भनाइ छ ।
मृत्यु भएका वा बसाइसराई गरी गएका मतदाताको नाम हटाउन सूचना दिन र नागरिकता त्याग गरेका वा रद्द भएका मतदाताको सूचना पनि दिन सकिने उहाँले बताउनुभयो । त्यसपछि फरक–फरक जिल्लामा दोहोरो नाम परेको सम्बन्धमा प्राप्त निवेदनसहित जिल्लामा गरिएको अद्यावधिक विवरण निर्वाचन कार्यालयले आयोगमा पठाउनेछ ।
मंसिर ४ गते भएको प्रतिनिधिसभा र प्रदेशसभा निर्वाचनपछि जिल्लामा एक हजार १७९ जनाले मतदाता नामावलीमा नाम दर्ता गराएका छन् । जसमध्ये सबैभन्दा धेरै चितवन–२ मा ६३१ मतदाता थपिएका छन् । जिल्लामा कुल मतदाताको संख्या चार लाख नौ हजार ५२१ पुगेको छ ।
निर्वाचन कार्यालयका अनुसार चितवन–१ मा २६४ र चितवन–३ मा २८४ मतदाता थपिएका छन् । क्षेत्रगतरुपमा हेर्दा चितवन–१ मा एक लाख ४० हजार १०९, चितवन–२ मा एक लाख २४ हजार ८४६ र चितवन–३ मा एक लाख ४४ हजार ५६६ मतदाता संख्या पुगेको छ । दाबी विरोध कार्यक्रम सम्पन्न भएपछि केही मतदाताको संख्या घट्न सक्छ ।
गत ४ मंसिरको चुनावबाट चितवन २ बाट विजयी भएका राष्ट्रिय स्वतन्त्र पार्टीका सभापति रवि लामिछाने नागरिकता विवाद मुद्धामा सर्वाेच्च अदालतले दोषी ठहर गरेसँगै उहाँको सांसद पद खारेज भएको थियो । र, सर्वाेच्चको फैसलासँगै रिक्त सांसद पदमा उपनिर्वाचन हुन लागेको हो ।
