१२ चैत्र २०७९, आईतवार २२:०६
गैँडाकोट, चैत्र १२
नवलपुरको गैँडाकोटमा “स्वास्थ्यको लागि खेलकुद, राष्ट्रको लागि खेलकुद” भन्ने मुल नाराका साथ गैँडाकोट दोस्रो मेयरकप नगरस्तरीय फुटवल प्रतियोगिता हुने भएको छ । गैँडाकोट खेलकुद समितिको आयोजनामा चैत्र १८ गतेदेखि प्रतियोगिता सुरु हुन लागेको पत्रकार सम्मेलनमा जानकारी दिइएको थियो ।
गैँडाकोट क्षेत्रीय रंगशालाकाे खेलमैदानमा आयोजना हुने प्रतियोगितामा नगरका १८ वटै वडाका २३ वर्ष मुनिका प्रतियोगीहरु सहभागि हुने गैँडाकोट खेलकुद समितिका अध्यक्ष लक्ष्मण कार्कीले जानकारी दिनुभयो । प्रतियोगितामा प्रथम हुने समूहलाई ५० हजार नगद सहित शिल्ड, मेडल र प्रमाणपत्र प्रदान गरिनेछ भने दोस्रो हुने समूहलाई ३५ हजार नगद सहित शिल्ड, मेडल र प्रमाणपत्र प्रदान गरिने आयोजकले जनाएको छ ।
त्यसैगरी खेल अवधिभर उत्कृष्ट खेलाडी तथा सर्वाधिक गोलकर्तालाई समेत पुरस्कारको व्यवस्था गरिएको छ ।गैँडाकोट नगरपालिकाको प्रर्वद्धनमा हुन लागेको प्रतियोगिताको नगर युवा सञ्जाल गैँडाकोटले समन्वय गरेको छ भने सहयोगी संस्थामा गैँडाकोट ४,५ र ८ युवाक्लव रहेको छ ।
गैँडाकोट खेलकुद समितिका अध्यक्ष लक्ष्मण कार्कीको अध्यक्षता तथा गैँडाकोट नगरपालिका वडा नं. ४ का अध्यक्ष तेजप्रसाद घिमिरेको प्रमुुख आतिथ्यतामा भएको पत्रकार सम्मेलनमा समितिका उपाध्यक्ष रमेश तिवारी, कोषाध्यक्ष गजेन्द्र बन, सदस्यहरु गौरवभक्त अधिकारी, झलक बहादुर राना लगायतको उपस्थिति रहेको कार्यक्रमकाे संचालन शंकर अधिकारीले गर्नुभएकाे थियाे ।
