३० चैत्र २०७९, बिहीबार ०७:५४
काठमाडौं, चैत्र ३०
प्रधानन्यायाधीश नियुक्ति प्रक्रिया अघि नबढे आन्दोलन गर्ने नेपाल बार एशोसिएसनले चेतावनी दिएको छ ।
नेपाल बार एशोसिएसनले हिजो बुधबार काठमाडौंमा पत्रकार सम्मेलन गर्दै प्रधानन्यायाधीश नियुक्तिका विषयमा बिहीबार प्रधानमन्त्रीको ध्यानाकर्षण गराउने र दशदिनभित्र नियुक्ति प्रक्रिया अघि नबढे आन्दोलन गर्ने जनाएको हो । पत्रकार सम्मेलनमा नेपाल बार एशोसिएसनका अध्यक्ष गोपालकृष्ण घिमिरेले न्यायपालिका नेतृत्वविहीन भएको एक वर्षसम्म पनि प्रधानन्यायाधीश नियुक्तिको प्रक्रिया अघि नबढेको भन्दै अब बार चुप लागेर नबस्ने बताउनुभएको छ ।
उहाँले व्यवस्थापिका र कार्यपालिकाले सर्वोच्च लगायतका न्यायपालिकालाई हेपेको बारको ठहर रहेको जिकिर गर्नुभयो । उहाँले सात देखि १० दिन सम्म प्रधानन्यायाधीश नियुक्ति प्रक्रिया अघि नबढे आन्दोलनका कार्यक्रम सार्वजनिक गरेर अघि बढ्ने स्पष्ट पानुभयो ।
त्यस्तै घिमिरेले लामो समयदेखि सर्वोच्चमा प्रधानन्यायाधीश र न्यायाधीश रिक्त रहेको, उच्च अदालत र जिल्लामा समेत न्यायाधीश खाली रहेकाले संवैधानिक परिषद्का अध्यक्ष समेत रहनुभएका प्रधानमन्त्रीको ध्यानाकर्षण गराउने बताउनुभयो ।
