७ बैशाख २०८०, बिहीबार ०९:३८
काठमाडौं, बैशाख ७
आमाको मुख हेर्ने पर्व आज देशभर आमालाई मीठा मीठा खानेकुरा खान दिई श्रद्धा भक्तिसाथ मनाइँदैछ । शास्त्रमा पिताभन्दा पनि ठूली मानिएकी आमाप्रति श्रद्धा, भक्ति, सम्मान र आदर गर्ने तथा उहाँबाट शुभाशीर्वाद थाप्ने दिनका रूपमा यो पर्वलाई लिइने शास्त्रीय परम्परा छ ।
प्रत्येक वर्ष वैशाख कृष्ण पक्ष औंसीका दिनमा जन्मदाता आमाको सम्मान तथा सम्झना गरी यो पर्व मनाउने गरिन्छ ।
आमाको मुख हेर्ने पर्वको प्रचलित यस पर्वमा टाढा टाढा रहेका छोराछोरीले आमालाई भेट्ने तथा विभिन्न मिष्ठान्न खान दिने चलन छ ।
आमा नहुने सन्तानहरुले बिहीबार बिहानै नुहाई धुवाई गरी आमालाई तर्पण र पिण्ड दिने तथा पुरोहितहरुलाई सिदा दान दिएर दिवङ्गत आमाको श्रद्धा गर्ने परम्परा छ ।
वैदिक सनातन धर्म ग्रन्थमा ‘जननी जन्मभूमिश्च स्वर्गादपि गरियसी’ अर्थात् जन्म दिने आमा र जन्मभूमि स्वर्गभन्दा पनि ठूला हुन् भनी आमाको महिना ब्याख्या गरिएको छ ।
मातातीर्थ औंसीको अवसरमा काठमाडौंको मातातीर्थमा बिहीबार विशेष मेला लागेको छ । आमा नहुनेहरुले त्यहाँ रहेको कुण्डमा आमाको आकृति सम्झेर तर्पण तथा पिण्डदान गर्ने गर्दछन् ।
काठमाडौंको चन्द्रागिरि नगरपालिकाले मातातीर्थ मेलाको अवसरमा बिहीबार सार्वजनिक बिदा दिएको छ ।
देशका अन्य तीर्थस्थलहरुमा पनि बिहानैदेखि भक्तजनहरुको घुँईचो लागेको छ ।
