१९ बैशाख २०८०, मंगलवार ०७:२२
काठमाडौं, बैशाख १९
तातोपानी नाका हिजो सोमबारदेखि दुईतर्फी रुपमा सञ्चालनमा आएको छ ।
पूर्णरुपमा सञ्चालनमा ल्याउने तयारी स्वरुप हिजो सोमबारदेखि दुईतर्फी आयात निर्यात सुरु भएको हो ।
हिजो सोमबार बिहान नेपालबाट तीन ट्रक मुढा र म्याट्रेस चीनतर्फ निर्यात भएको तातोपानी भन्सार कार्यालयका प्रमुख दयानन्द केसीले जानकारी दिनुभयो ।
गत महिना नेपाली र चिनियाँ अधिकारीबीच ल्हासामा भएको बैठकपछि नाका भूकम्प अघिकै अवस्थामा सञ्चालन गर्ने सहमति भए अनुसार सोमबारदेखि नेपाल र चीन दुवैतर्फबाट आयात निर्यात खुला भएको हो ।
सिन्धुपाल्चोक १ का प्रतिनिधिसभा सदस्य माधव सापकोटाले कूटनीतिक पहलकदमीले नाका दोहोरो पुनः सुरु भएको र छिट्टै मानव आवतजावत पनि सुरु हुने जानकारी दिनुभयो ।
यसअघि चीनबाट सामाग्री ल्याउन एकतर्फी सञ्चालमा रहेको तातोपानी नाका पहिले जस्तै नेपालबाट पनि सामाग्री लैजाने कार्य सुरु भएको छ ।
