३१ बैशाख २०८०, आईतवार १६:४८
काठमाडौं, बैशाख ३१
प्रमुख ३ दलका शीर्ष नेता र संसदीय दलका प्रमुख सचेतकहरु संसद्लाई प्रभावकारी बनाउने विषयमा छलफल भएकाे छ ।
नेपाली कांग्रेस, नेकपा एमाले र माओवादी केन्द्रका शीर्ष नेता र प्रमुख सचेतकहरुबीच आइतबार प्रधानमन्त्री निवास बालुवाटारमा छलफल भएकाे हाे । तीन ठूला दलका संसदीय दलका नेता र प्रमुख सचेतकहरुबीच सत्य निरूपण तथा मेलमिलाप सम्बन्धी विधेयकलाई छिटो टुंगोमा पुर्याउन संसदीय उपसमिति गठन गर्ने विषयमा छलफल भएको हो ।
प्रधानमन्त्री प्रचण्डको आह्वानमा बसेको बैठकमा जारी संसद् अधिवेशनलाई प्रभावकारी बनाउने र विभिन्न समितिहरू गठन गर्ने विषयमा केन्द्रित रहेको माओवादी केन्द्रका मुख्य सचेतक हितराज पाण्डेले जानकारी दिनुभयाे ।
बैठकमा संसदीय समितिहरूको नेतृत्व र प्रतिनिधित्व सहमतिका आधारमा गर्ने, संसदीय सुनुवाइ समिति गठन गर्ने लगायत विषयमा छलफल भएको प्रधानमन्त्रीको नीजि सचिवालयले जनाएको छ । सहमतिका साथ नै संसद्लाई प्रभावकारी रुपमा अघि बढाउने विषयमा छलफल केन्द्रित भएको थियो ।
छलफलमा प्रधानमन्त्री एवं माओवादी संसदीय दलका नेता पुष्पकमल दाहाल प्रचण्ड, कांग्रेस संसदीय दलका नेता शेरबहादुर देउवा, एमाले संसदीय दलका नेता केपी शर्मा ओली, उपप्रधान एवं रक्षामन्त्री पूर्णबहादुर खड्का, माओवादी मुख्य सचेतक हितराज पाण्डे, कांग्रेसका प्रमुख सचेतक रमेश लेखक, एमालेका संसदीय दलका उपनेता सुवास नेम्वाङ लगायत सहभागी हुनुभएकाे थियाे ।
