२७ जेष्ठ २०८०, शनिबार ०७:१०
काठमाडौं, जेठ २७
मध्य तथा पश्चिमी तराईका भूभागमा तापक्रम अझै केही दिन नघट्ने र तातो हावा चल्ने क्रम जारी रहने अनुमान गरिएको छ।
शुक्रबार तराईका धेरैजसो भूभागमा अधिकतम तापक्रम ४० डिग्री सेल्सियस भन्दा बढी मापन भएको थियो। चितवन, पर्सा, बाँके, बारा र सर्लाही लगायतका जिल्लामा तापक्रम ४२ डिग्री सेल्सियसभन्दा बढी मापन भएको महाशाखाले जनाएको छ।
महाशाखाले कोशी र कर्णाली प्रदेशका थोरै स्थान र बाँकी प्रदेशका पहाडी भूभागका एकदुई स्थानमा मेघगर्जन र चट्याङसहित क्षणिक वा हल्का वर्षाको सम्भावना रहेको जनाएको छ।
दिउँसो कोशी, कर्णाली र सुदूरपश्चिम प्रदेश लगायत देशका पहाडी भूभागमा आंशिकदेखि सामान्य बदली रही बाँकी भूभागमा मौसम सामान्यतया सफा रहनेछ। कोशी र कर्णाली प्रदेशका थोरै स्थान र अरु प्रदेशका पहाडी भूभागका १–२ स्थानमा मेघगर्जन र चट्याङसहित क्षणिक वा हल्का वर्षाको सम्भावना रहेको महाशाखाले जनाएको छ।
