१६ पुष २०८०, सोमबार १०:५०
चितवन, पुस १६
होटल व्यवसायी संघ चितवनको आयोजनामा क्याम्पाचौरमा भएको रैथाने फुड फेस्टिबल तथा वृहत सांस्कृतिक कार्यक्रममा आइतबार (हिजो) दर्शकहरु स्वप्न सुमनसँग झुमेका छन् । अंग्रेजी नयाँ वर्ष २०२४ को अघिल्लो दिन आइतबार राति स्वप्न सुमनले ९० मिनेटसम्म दर्शकहरुलाई मनोरञ्जन दिए । स्थानीय व्याण्ड र कलाकारहरुको प्रस्तुतीसँग पनि दर्शकले भरपूर मनोरञ्जन लिए ।
आजदेखि नयाँ वर्ष २०२४ सुरु भएको छ । फुड फेस्टिबलमा गएराति १ बजेसम्म सांस्कृतिक कार्यक्रम सञ्चालन भएको थियो । आइतबार ३०० रुपैयाँको टिकट काटेरै हजारौँ दर्शक फुड फेस्टिबलमा पुगेको होटल व्यवसायी संघ चितवनका वरिष्ठ उपाध्यक्ष ऋषिकेश अर्यालले जानकारी दिनुभयो ।
‘दर्शकले क्याम्पाचौर भरिभराउ भएको थियो । हामीले गरेको अपेक्षा भन्दा धेरै नै दर्शक आउनुभयो’, उहाँले भन्नुभयो । फुड फेस्टिबलमा आज द स्याडोज व्याण्डको टिम आउँदै छ । आयोजकले आज पनि ३०० रुपैयाँको टिकटको व्यवस्था गरेको छ । पुस १८ गतेसम्म हुने फुड फेस्टिबलमा भोलि र पर्सीका लागि भने टिकट राखिएको छैन ।
व्याण्डहरुलाई पारिश्रमिक दिएर ल्याइएकाले दुई दिन टिकटको व्यवस्था गर्नुपरेको होटल व्यवसायी संघका अध्यक्ष लोकनाथ भट्ट (कृष्ण)ले बताउनुभयो । फुड फेस्टिबलमा साना ठूला गरी ३९ वटा स्टलको व्यवस्था गरिएको छ । करिब पाँच करोड भन्दा माथीको कारोबार हुने अपेक्षा गरिएको फुड फेस्टिबलमा ५० हजार भन्दा बढीले अवलोकन गर्ने अनुमान गरिएको भट्टले बताउनुभयो ।
