१० माघ २०७९, मंगलवार ०८:४५
काठमाडौं , माघ १०
आज (मंगलबार) पश्चिमी न्यूनचापीय प्रणालीको प्रभावले देशको पश्चिमी क्षेत्रमा हिमपात र वर्षाको सम्भावना छ।
सुदूरपश्चिम, कर्णाली, लुम्बिनी र गण्डकी प्रदेशका केही स्थानमा मेघगर्जनसहित हल्का वर्षाको सम्भावना रहेको जल तथा मौसम विज्ञान विभागले जनाएको छ। साथै सुदूरपश्चिम,कर्णाली र गण्डकी प्रदेशका उच्च पहाडी तथा हिमाली भू–भागमा हल्का देखि मध्यम हिमपातको प्रक्षेपण गरिएको छ।
वर्षा र हिमपातसँगै चिसो हावासमेत चल्ने भएकाले यी प्रदेशमा अबको केही दिनमा हुस्सु र कुहिरो हट्ने अनुमान छ। मौसमविद्का अनुसार अहिले कर्णाली र गण्डकी प्रदेशका उच्च पहाडी तथा हिमाली भेगमा हल्का वर्षासँगै हिमपात भइरहेको छ।
आज बिहान काठमाडौंको न्यूनतम तापक्रम ४.९ डिग्री सेल्सियस मापन भएको छ भने अन्य स्थानमा मौसममा आंशिकदेखि सामान्य बदली भएको विभागले जनाएको छ।
