प्रतिनिधि सभाका तीन समितिको बैठक आज बस्दै

काठमाडौँ, भाद्र २५

आज संघीय संसदको प्रतिनिधि सभाका तीन समितिको बैठक बस्दैछ । आज बिहान साढे ९ बजे बस्ने कृषि तथा प्राकृतिक स्रोत समितिको बैठकमा जलवायुजन्य विपद्का कारण कृषि तथा प्राकृतिक स्रोतमा परेको असर र जलवायु अनुकूलन तथा जलवायु न्यायका लागि नेपालले अवलम्बन गर्नुपर्ने पहलहरू सम्बन्धमा कृषि, वन तथा पर्यावरणमन्त्री, सचिव र वातावरण विज्ञसँग छलफलको कार्यसूची रहेको समितिले जानकारी दिएको छ ।

त्यस्तै, विहान १० बजे बस्ने उद्योग तथा वाणिज्य र श्रम तथा उपभोक्ता हित समितिको बैठकमा उपसमिति गठन सम्बन्धमा छलफलको कार्यसूची रहेको छ ।

त्यसैगरी, बिहान ९ बजेदेखि शुरु हुने कानुन, न्याय तथा मानव अधिकार समितिको बैठकमा फैसला कार्यान्वयनको वर्तमान अवस्था, चुनौती र भावी कार्ययोजना बारे फैसला कार्यन्वयन निर्देशनालयसँग छलफलको कार्यसूची रहेको छ । साथै बैठकमा कानुनमन्त्री, सचिव र निर्देशनालयका महानिर्देशकलाई बोलाइएको समितिले जानकारी दिएको छ ।