पार्टीको हैसियत अनुसार तीन वटा मन्त्रालयमा दाबी गरेका छौं : झलनाथ खनाल

काठमाडौं, चैत्र १४

नेकपा एकीकृत समाजवादीका सम्मानित नेता झलनाथ खनालले पार्टीको हैसियत अनुसार तीन वटा मन्त्रालयमा दाबी गरेको बताउनुभएको छ ।

मंगलबार काठमाडौंको बानेश्वरमा मिटरब्याज पीडितहरूको आन्दोलनमा ऐक्यबद्धता जनाउन पुगेका खनालले सञ्चारकर्मीसँग कुरा गर्दै अहिले संघीय संसद्‍मा नेकपा एकीकृत समाजवादीसँग १८ सिट रहेकाले पार्टीको हैसियत अनुसार नै मन्त्रालयको सिट माग गरिएको बताउनुभयो ।

उहाँले १० दल सरकारमा जाने र मन्त्रालयको सिट २५ रहेकाले दलहरूको भूमिकाका आधारमा मन्त्रिमण्डल बाँडफाँट गर्नुपर्ने धारणा राख्नुभयो । उहाँले सरकारको पाँच वर्षे नीति कार्यक्रमको योजना बनाएर मात्रै मन्त्रिमण्डल बाँडफाँट गर्न प्रधानमन्त्रीलाई सुझाव दिएको उल्लेख गर्नुभयो ।

त्यस्तै खनालले मिटरब्याज पीडितहरूको माग जायज रहेको भन्दै आन्दोलनमा समर्थन रहेको बताउनुभयो । उहाँले मिटरब्याज पीडितहरूको समस्या समाधान गर्न सरकारको ध्यानाकर्षण गराउने पनि बताउनुभयो ।