११ बैशाख २०८०, सोमबार ०८:३२
काठमाडौं, बैशाख ११
देशभर आंशिकदेखि सामान्य बदली रही सुदूरपश्चिम, कर्णाली, लुम्बिनी, गण्डकी र वाग्मती प्रदेशका थोरै स्थानमा हल्का वर्षा भइरहेको छ । काठमाडौंका केही स्थानमा सिमसिम वर्षा भइरहेको छ ।
जल तथा मौसम विज्ञान विभागको मौसम पूर्वानुमान महाशाखाका अनुसार हाल देशमा पश्चिमी वायुको साथै स्थानीय वायुको प्रभाव रहेको छ ।
आज (सोमबार) दिउँसो देशभर आंशिकदेखि सामान्यत: बदली रहनेछ । देशका केही स्थानमा मेघ गर्जन/चट्याङसहित हल्का/क्षणिक वर्षाको सम्भावना छ । महाशाखाका अनुसार तराईका थोरै स्थानमा हावा-हुरीको सम्भावना छ ।
सोमबार राति भने लुम्बिनी, गण्डकी, कर्णाली र सुदूरपश्चिम प्रदेशलगायत देशका पहाडी भू-भागमा आंशिकदेखि सामान्यत: बदली रही बाँकी भू-भागमा मौसम सफा रहने महाशाखाद्वारा जारी नियमित बुलेटिनमा उल्लेख छ । देशका पहाडी भू-भागका थोरै स्थानमा मेघ गर्जन/चट्याङसहित हल्का/क्षणिक वर्षाको सम्भावना छ ।
