७ जेष्ठ २०८०, आईतवार १७:२२
चितवन, जेठ ७
रत्ननगर नगरपालिकाले निर्वाचित जनप्रतिनिधि पदबहाली भएको एक वर्ष पूरा भएको अवसरमा हिजो शनिबार पत्रकार सम्मेलन गरी कार्यप्रगति प्रस्तुत गरेको छ । रत्ननगर नगरपालिकाले चालु आव २०७९/०८० मा एक अर्ब ८६ करोड ३३ लाख ७० हजार ७१० बजेट विनियोजन गरेकोमा वैशाख मसान्तसम्ममा ७० करोड ८८ लाख ५७ हजार ७३० रुपैयाँ अर्थात् ४२.१ प्रतिशत खर्च भएको नगरप्रमुख प्रल्हाद सापकोटाले जानकारी दिनुभयो । उहाँले आफू जनप्रतिनिधिमा पदबहाली भइसकेपछि चुनावमा प्रतिबद्धता गरेका धेरै विषय कार्यान्वयनको चरणमा रहेको बताउनुभएको छ ।
नगरप्रमुख सापकोटाले आफ्नो कार्यकालमा सम्पन्न भएका २६ बुँदे कार्यप्रगति विवरण सार्वजनिक गर्नु भएको हो । जसअन्तर्गत रत्ननगरका तीन हजार विपन्न परिवारलाई स्वास्थ्य बिमा उपलब्ध गराउनुका साथै स्वास्थ्य बिमाबाट वञ्चित विपन्नलाई उपचारका लागि बकुलहर रत्ननगर अस्पतालमा विपन्न नागरिक उपचार कोष व्यवस्थापन गरिएको र सोही अस्पताल परिसरमा मातृशिशु भवन निर्माणाधीन रहेको उहाँले जानकारी दिनुभयो । रत्ननगरलाई उज्यालो रत्ननगर बनाउने लक्ष्यअनुरुप निपनी, बकुलहर, सौराहाचोक र टाँडीचोकमा मास लाइटको व्यवस्था गरिएको उहाँले जानकारी दिनुभयो ।
फोहोर व्यवस्थापनमा नेपालकै उत्कृष्ट नगर हुन सफल भई ‘बिल एण्ड मेलिन्डा गेट्स फाउन्डेसन’बाट पाँच हजार डलर पुरस्कार पाउन सफल भएको खुसी पनि उहाँले सो अवसरमा साँटनुभयो । बजार क्षेत्रमा पार्किङ व्यवस्थापन, विद्युत्को पोलहरुबाट अनावश्यक तार हटाउने र मापदण्डविपरीत सडक मिचेर बनाइएका अनाधिकृत संरचनाहरु हटाई व्यवस्थित र सुन्दर नगर निर्माणको प्रक्रिया थालनी गरिएको नगरप्रमुख सापकोटाले बताउनुभयो । नगरपालिकामा भू–उपयोग तथा घरजग्गा वर्गीकरण अन्तिम चरणमा पुगेको, वाङ्मय परिषद् स्थापना गरी सञ्चालनमा ल्याइएको, नगर मेलमिलाप केन्द्र पुनर्गठन गरिएको र धेरै समयदेखि तामेलीमा रहेका मुद्दाहरुको समस्या समाधान गरी सुशासन कायम गरिएको उहाँले बताउनुभयो ।
विकास निर्माणका योजनाअन्तर्गत सौराहाको राप्तीकिनारमा ७ करोड ५० लाख रुपैयाँको लागतमा ड्याक निर्माण कार्य सम्पन्न भएको, नगरपालिकाको मागबमोजिम संघीय सहरी विकास मन्त्रालयमार्फत १४ करोड २४ लाखको लगानीमा सौराहा राप्ती ड्याकदेखि हर्नरीपुलसम्म साइकल लेन र फुटपाथसहितको १५ मिटर चौडाइको सडक निर्माण भइरहेको, २ करोड ३५ लाख रुपैयाँमा ठेक्का सम्झौता भई हस्पिटलरोडमा फुटपाथसहितको सडक नाला निर्माण सुरू गरिएको र २९ करोड रुपैयाँको लगानीमा कयरखोला तटबन्ध निर्माण कार्य अन्तिम चरणमा पुगेको उहाँले जानकारी दिनुभयो ।
यस्तै, झुवानी बस्तीको सुरक्षाका लागि ढुङ्ग्रेखोलामा ८०० मिटर तटबन्ध निर्माणको काम अन्तिम चरणमा पुगेको, चित्रसारीपुलदेखि सौराहाड्याकसम्म फुटपाथ तथा साइकल लेनसहितको सडक निर्माण गरिएको उहाँले जानकारी दिनुभयो । उहाँले खगेरीखोलामा मिनीक्रुजसहितको हरियालीपार्क निर्माण गरिने, पञ्चकन्या सामुदायिक वनअन्तर्गत रहेको १७ हेक्टर जमिनमा तारजालीसहित बर्दिया राष्ट्रिय निकुञ्जबाट १९ वटा कृष्णसार ल्याइने, खगेरीपुलको आडमा फुटबल तथा क्रिकेटको ग्राउन्ड निर्माण गरिने र रत्ननगर–१२ स्थित वागदेवी इन्जिनियरिङ कलेज स्थापनाको प्रक्रियामा रहेको जानकारी दिनुभयो ।
यसैगरी, शैक्षिक गुणस्तर कायम राख्न कक्षा ८ को परीक्षा सञ्चालन गरी नतिजा कोडिङ र डिकोडिङमार्फत प्रकाशन गरिएको, प्राविधिक शिक्षामा १० जना विद्यार्थीलाई ५० प्रतिशत छात्रवृत्ति, विपन्न परिवारका १९ जनालाई उच्चशिक्षामा छात्रवृत्ति र निजी विद्यालयमा दलित, अल्पसंख्यक र जेहेन्दार विद्यार्थीलाई १० प्रतिशत छात्रवृत्तिको व्यवस्था गर्न लागिएको नगरप्रमुख सापकोटाले पत्रकार सम्मेलनमा बताउनुभयो । कार्यक्रममा रत्ननगरका विभिन्न शाखामार्फत भएका कार्यप्रगति विवरण प्रस्तुत गरिएको थियो ।
कार्यक्रममा उपप्रमुख यादवप्रसाद पाठक, प्रमुख प्रशासकीय अधिकृत छविलाल सुवेदी, नगरशिक्षा अधिकारी बद्रिनारायण शर्मा, विज्ञ सल्लाहकार रामहरि न्यौपाने, नगरप्रवक्ता कुलप्रसाद सापकोटा लगायत राजनीतिक दलका नेता, वडाध्यक्ष, कर्मचारी एवं कार्यपालिका सदस्यहरुको सहभागिता रहेको थियो ।
