शेयर बजारमा बुधबार दोहोरो अंकको गिरावट

काठमाडौं, साउन ३२

शेयर बजारमा हिजो बुधबार पनि दोहोरो अंकको गिरावट जारी रह्यो ।

उतार चढावबीच बजार परिसूचक २० अंकले ओरालो लागेर २ हजार २५ मा आएर थामियो ।

सबै समूह राताम्मे रहँदा कारोबार डेढ अर्ब हाराहारीमै खुम्चियो । जलविद्युत समूहमा सबैभन्दा उच्च २ प्रतिशत बराबरको गिरावट आयो ।

बाँकी पनि अधिकांश समूहमा १ प्रतिशतमाथिको गिरावट आयो । यसदिन नेपाल स्टक एक्सचेन्जमा २ सय ६९ कम्पनीको ४८ लाख ३८ हजार कित्ता शेयर १ अर्ब ६८ करोड बराबरमा किनबेच भएको एक्सचेन्जले जनाएको छ ।