चितवन, वैशाख २
नेपाली कांग्रेसका सहमहामन्त्री जीवन परियारले नेपाली कांग्रेस राजनीतिक दलहरुको साझा अभिभावक भएको बताउनुभएको छ ।
नेपाली कांग्रेस चितवनले आज भरतपुरमा गरेको नयाँ वर्ष २०८१ सालको अवसरमा शुभकामना आदानप्रदान तथा भित्तेपात्रो बिमोचन कार्यक्रममा सहमहामन्त्री परियारले कांग्रेसको अभिभावकीय आड र भरोसाको अपेक्षा अन्य सबै राजनीति दलहरुले खोजिरहेको बताउनुभयो ।
उहाँले देशमा जति पनि राजनीतिक दलहरु रहेका छन् ती सबैको अभिभावक कोही छ भने त्यो नेपाली कांग्रेस नै रहेको दाबी गनुभएको छ । ‘कांग्रेस माथि आमनागरिकले देखाएको विश्वासलाई हामी कदापी मर्न दिदैनौ’ सहमहामन्त्री परियारले भन्नुभयो ,‘न्याय नपाए गोर्खा जानू भने जस्तै अभिभावक नभए कांग्रेसले सबैलाई अभिभाकत्व प्रदान गर्नेछ । ’
कार्यक्रममा नेपाली कांग्रेस चितवनका सभापति राजेश्वर खनालले कार्यक्रमको विषयवस्तुमाथि प्रकाश पार्नुभएको हो ।
कार्यक्रममा नेपाली कांग्रेसका केन्द्रीय सदस्य टेकप्रसाद गुरुङ, दिनेश कोइराला, बागमती प्रदेशका पूर्वस्वास्थ्यमन्त्री उत्तम जोशी, बागमती प्रदेश कार्यसम्पादन समितिका सदस्य कैलाश कोइराला, नेपाल शिक्षक संघ चितवनका अध्यक्ष इन्दिरा मरहट्टा, भरतपुर महानगर सभापति चित्रसेन अधिकारीलगायतले शुभकामना मन्तव्य राख्नुभएको हो ।
कार्यक्रममा बागमती प्रदेश सांसद गीता गुरुङ, माया श्रेष्ठ, बिनु रायमाझी, जिल्लाका पूर्वसभापतिहरु, क्षेत्रीय सभापतिहरु, महासमिति सदस्यहरु पार्टीका सबै तह र तप्काका नेता तथा कार्यकर्ताहरुको उपस्थिति रहेको थियो ।
कार्यक्रममा नेपाली कांग्रेस चितवनले प्रकाशन गरेको २०८१ सालको भित्तेपात्रो बिमोचन पनि गरिएको थियो ।
