राजनीति

काठमाडौँ, जेठ ५ सहकारी प्रकरणका संसदीय छानबिन समिति गठन हुनुपर्नेमा प्रतिपक्षी पाँच दल एकमत देखिएका छन् । शुक्रबार प्रतिपक्षी दल नेपाली काँग्रेसको आह्वानमा भएको बैठकमा संसदीय छानबिन समिति गठन हुनुपर्ने निष्कर्ष निकालिएको महामन्त्री गगन थापाले जानकारी दिनुभयो । बैठकमा काँग्रेसका साथै लोसपा, जसपा नेपाल, राप्रपा र राष्ट्रिय जनमोर्चाको सहभागिता थियो ।

काठमाडौँ, जेठ ५ प्रतिनिधिसभाको बैठक हिजो बस्दै नबसी स्थगित भएको छ । दलहरुबीच सहमति नबनेपछि बिहान ११ बजेका लागि बोलाइएको बैठक सूचना टाँसेर आइतबार बिहान ११ बजेसम्मका लागि स्थगित गरिएको हो । सभामुखले आगामी बैठक सौहार्दपूर्ण वातावरणमा सञ्चालन हुने विश्वास जनाएको बताइएको छ ।

काठमाडौँ, जेठ ४  प्रतिनिधिसभाको बैठक आज बिहान ११ बजे बस्दैछ । बिहीबार भएको बैठक प्रमुख प्रतिपक्षी नेपाली कांग्रेसको अवरोधका कारण स्थगित भएको थियो । सभामुखले जबरजस्ती बैठक सञ्‍चालन गर्न खोजेपछि बिहीबारको बैठकमा तनावसमेत उत्पन्न भएको थियो । कांग्रेसले सहकारी ठगी प्रकरणमा संसदीय समितिको माग राख्दै संसद्‌को अवरोध जारी राख्ने बताएको छ ।

काठमाडौँ, जेठ ४  नेपाली कांग्रेसकाे संसदीय दल कार्यसमिति र संसदीय दलको बैठक बस्दैछ । संसदीय दलको बैठक ९ बजे बस्न लागेको कांग्रेसले जानकारी दिएको छ । त्यसअघि संसदीय कार्यसमितिको बैठक र बिहान ८ः३० बजे बस्न लागेकाे हाे ।

काठमाडौँ, जेठ ३ संघीय संसद्अन्तर्गत प्रतिनिधिसभाको बैठक आज बस्दैछ । बैठक बिहीबार बिहान ११ बजेका लागि बोलाइएको छ । प्रमुख प्रतिपक्ष दल नेपाली काँग्रेसले संसद् बैठक अवरुद्ध गर्दै आएकाले बैठक बोलाइए पनि संसद् चल्छ वा चल्दैन अनिश्चित छ । संसद्को अवरोध खोल्ने विषयमा पटक-पटक छलफल भएपनि अहिलेसम्म ठोस सहमतिमा भने पुगेको छैन ।

काठमाडौँ, जेठ १ नेपाली काँग्रेसको संसदीय दलको बैठक आज बस्दैछ । सोमबार बस्ने भनिएको बैठक स्थगित गरि आज बिहान ८ बजेका लागि सारिएको हो । बैठक सिंहदरबारस्थित संसदीय दलको कार्यालयमा बस्ने जनाइएको छ । सहकारी ठगीमा संसदीय छानबिन समिति गठन गर्ने काँग्रेसको मागलाई सत्तारुढ पक्षले असम्भव भनेकाले काँग्रेसले आजको बैठकबाट थप रणनीति बनाउने प्रयासमा छ ।